~ يستاهـل البـرد من ضيع دفــاه ~

أمانه يالشتاء .. دامك قريب
ولكـ بصدري باب ~
رفض كل الفصول ولارضى
غيرك أنت ( مفتاحـه ) ..
أمانه دامني ماني على خبركـ
دفـا وأحبـاب ~
تريث .. لين أشب اللي بقى
من كلمة الراحـه ..

مساكم الله بالخيـر جميعـا

كيفكم مع هالبرد يقولون مابعد جاء

في كل سنه نقول هذا أبرد شتاء مر علينا وهو كل سنه يجي بس ابناء الجزيره

لانه تجينا صقعة شمس بالصيف تبخره وتخلينا ننسى كل أحداث العام

نرجع نردد مقولتنا " هالسنه أبرد سنه

بمناسبة دخول فصل الشتاء الي (يشطب العظم) أعاننا الله وأياكم عليه

نلجأ لوسائل التدفئه الي لولا الله ثم هي كان صرنا في خبر كان

طبعا الحمدلله الي رزقنا بأشياء تدفينا وتكفينا البرد وغيرنا يقاسي آلامها ولهيبها

بموضوعي راح أتكلم عن أبرز ملامح الشتاء وأهم الأشياء اللي نستخدمها علشان نتجنب البرد ..

وأبرز المواقف الي تذكرنا بكل نوع ..

النــار

أول وأقدم وأحلى وسيله عرفها الانسان اللي هي النار

ويسمونهـا فاكهة الشتاء

أحلى السواليف الشتويه تطلع عندها ويازينها لاصار معها قهوه وحليب وحنيني

طبعا للحطب الي يستخدم فيها أنواع كثيره منها الرمث والسمر والارطاء والقرض ..

بس والله ياريحتها بالشتاء تجنن تحسها خشبات حنونه ورحومه وعطوفه يكفي انها تحترق علشان انتم تدفون

على الهامش : يقولون فيه محشش " أبوه ميت " كان بردااان قام شب له نار ويوم دفى قال ايييه الله لايحرمك منها يا أبوي

على طاري ريحة الضوء احد جيراننا عندهم شايب كان دايم يشب من بعد صلاة الفجر

فكنت وانا طالعه للدوام أشم ريحة الضوء وأتحسر على عمري

أتخيله جالس عند النار ودلة حليب وقهوه كنت أتمنى أروح أتقهوى معه

بس من تالي ماعاد شميت ريحتها تهقون شايبهم مات والا ملحقهم خرب

الدفايـه

لها أشكل وأنواع وأحجام وألوان بس مشكلتهن ان كلهن يشتغلن على الكهرب < احلفي

يعني إذا لاسمح الله طفى الكهرب انسوا ان عندكم دفايه

أشهر أنواع الدفايات اللي هي دفاية الزيت

ميزتها انها تدفي البيت وتدفي الغرف بشكل عام

ومفيده بعد غير انها تدفي رهيبه للي يبي ينشر عليها ثياب رطبه تنشفها بسرعه

زمان كانت شي رئيسي لغرفتي بالشتاء وأخليها تشتغل بالغرفه 24 ساعه

بس صار لي موقف منها وكرهتها كنت مشغلتها كالعاده ودخلت الغرفه بانام بس تذكرت شي وقمت

يوم رجعت لقيتها يطلع منها دخان أنا طقتني أم الركب وصرخت لأبوي وجاء وفصل السلك والحمدلله ستر الله

بس من يومها ماطبت غرفتي جاني فوبيا منها

ثاني نوع اللي هو يجي فيها شمعات

هذي ميزتها انها تقرب بين أفراد الاسره وتجمعهم بعد الشتات

أحلى شي فيها أنك تقدر تدفي يدينك وتمدد رجيلاتك عندها وتدفى بسرعه << دايم نتزاحم عندها إذا اجتمعنا

بالنسبه لي أفضلها على أم زيت

البطانيـه

أيييييه عاد هذي حكاية ثانيه وقصص ترويها أحلام الشتاء

تدرون ليش النوم لذيذ بالشتاء .. ترى سببه هالبطانيه

الله من مره ومره طنشت الكليه بسبت هالبطانيه أتغطى فيها ومايطلع الا خشمي

وبينما أنا ناايمه ودفياانه إلا والمنبه يرن يبيني أقوم أروح للكليه كلية أيش

أحد يترك الدفاء ويروح للصقيع طبعا يكون جوابي ساعتها بلا كليه بلا شقاء

وأكملها نومه

الفروه

أول كانت بس للرجال بس الحين حتى حنا صار عندنا موديلات نسائيه وأحلى بعد

ميزتها أنها تدفي بضميـر

وين ماتروح ووين ماتجي هي معك

داخلها فرو بأنواع كثيـره ومن برا مزخرفه بنقوش وزخارف

الشرّاب

وفيه بعد لليدين بس انه يضايق

طبعا أهم شي بالبرد أنك تدفي رجلينك لانه أذا دفوا خلاص ماعندك مشكله

دايم هن آخر مايدفى وأول من يبرد

والسبب لهالظاهره الفسيولوجيه بصراحه ما اعرفه بس انتم دوروا وابحثوا

الكاب أو الطربوش أو الطاقيه

ميزته يدفي الرأس والاذان من هالهواء اللي يشخف < أتحداكم يا أهل الحجاز وش معناة يشخف

البرد خطر إذا دخل الراس والأذان علشان كذا ضروري

اننا نلبس أي شي يحميه من الهواء البارد أما طاقيه أوحتى شال ..

.

.

بكذا أكون وصلت لنهاية موضوعي البسيط ..

أتمنى أنه يكون نال على استحسانكم

لا تحرمونا من ردودكم ومواقفكم ومشاعركم الشتويه

ربي يحفظكـم ويرعاكـم

دمتم بدفـء

~** يستاهـل البـرد من ضيع دفــاه **~

~ يستاهـل البـرد من ضيع دفــاه ~