\ مالي ومال الحب وازعاجة / ّ \

ياصغيّر السن قدرك طاحت أبراجه
الجرح خلى الصخر ينطق ونطقنـي

خلاص ماعاد تعنينـي ولا حاجـه

رح جعل ربـي يوفقـك ويوفقنـي

من بعد ما كنت نور العمر وسراجه

اليوم صرت الظلام اللـي يطوقنـي

عطيتك أكثر من اللي كنت تحتاجـه

أسرفت فالحب لين الحب وهقنـي

خلاص مالي ومال الحب وإزعاجه

مالي ومال الدروب اللي تضايقنـي

تعبت أضم البحر واهـدي أمواجـه

تعبت أجامل وأشوف الوقت يسرقني

شكواي للي عليه الضيق وافراجـه

اللي إذا شاء يرحمنـي ويرزقنـي

أما انت يابو جبين عقّـد احجاجـه

لاعاد تسأل علامك منـت طايقنـي

الناس كلٍ على دربـه ومنهاجـه

وأنا عن الناس مابه شي يفرقنـي

إلا اني دايم أحب الصـدق وأواجـه

مخلوق والله على هالوضع خالقني

حتى رفيقي ضماد القلب وعلاجـه

على كثر ما أتمسك فيـه صدقنـي

لو ادري انه مرافقني على حاجـه

لاامسّكه حاجتـه وأقـول فارقنـي